Gihangyo ni Pope Francis ang mga matuuhon nga magpadayon sa pag-ampo alang kaniya.
Mao kini ang mensahe nga iyang gipadala atol sa tradisyonal nga pag-ampo nga Angelus prayer sa Vatican.
Sulod sa duha ka sunodsunod nga semana, wala siya makatambong sa maong pag-ampo.
Sa iyang mensahe, nagpadayon siya sa iyang pakigbisog sa iyang sakit sa Gemelli Hospital sa Roma.
Wala niya kalimti ang pagpasalamat sa iyang mga doktor ug mga health worker sa ospital, ingon man sa mga maayong buot nga nagpadala og mga mensahe.
Sukad nadala sa ospital ang 88-anyos nga Santo Papa, nag-vigil na ang mga matuuhon.
Ang iyang mga doktor sa sinugdan miingon nga ang Santo Papa nagkinahanglan og dugo tungod sa iyang ubos nga platelet count, nga nalambigit sa anemia.
Gawas niini, nagkinahanglan pa siya og “high flow” oxygen tungod sa iyang kalisod sa pagginhawa.
Kahinumdoman nga niadtong Pebrero 14, ang Santo Papa daling gidala sa tambalanan tungod sa bronchitis, nga nigrabe ngadto sa pneumonia sa duha ka baga.
