CEBU CITY-Gitugyan na ni Cebu City Mayor Raymond Alvin Garcia ngadto sa Legal Office ang giingong pagpa-blotter sa kagamhanan sa dakbayan sa Sugbo kang Dismissed Cebu City Mayor Michael Rama kalabot sa wala pa giuli nga government-issued vehicle.
Matud ni Garcia nga nasayod na siya sa pag-file og blotter apan nagdumili kini sa paghatag og dugang komento inay iya na kining gitugyan sa ilang Legal Office alang sa sunod nga lakang nga buhaton.
Ingon man nga mi-awhag ug nanghinaot kini nga i-uli na ni Rama ang sakyanan nga anaa sa puder sanglit iya man kini sa kagamhanan sa siyudad ug aron malinawon nga makauswag na sa mga umaabot nga panahon.
Gipaambit usab niini nga kasamtangang nagpaabot nalang ang Mayor sa General Services sa inventory sa mga sakyanan nga wala pa nanga-uli, diin ang van nga anaa ni Rama nalang ang gipaabot usab sa General Services.
Samtang, sa dihang gikuhaan og habig ang Waterfront Police Station kay giklaro niini nga wala pa sila makakita ug makadawat sa blotter ug wala usab masayod kung unsa nga kaso ang nabutang sa blotter.
Hinungdan nga nagdumili usa sila sa paghatag og komento kalabot sa maong hisgutanan ug gipaabot nalang niya nga ang Cebu City Police Office headquarters ang mohatag sa pagpasabot.
