Ilusad sa Pilipinas ug South Korea ang 2024/25 Knowledge Sharing Program (KSP), usa ka bilateral cooperation nga nagtumong sa pagpalig-on sa kooperasyon sa enerhiya ug pagtukod og mas luwas ug lig-on nga sistema sa enerhiya.
Ang maong programa subay sa mga diskusyon tali sa mga kagamhanan sa South Korea ug Pilipinas niadtong Agosto sa miaging tuig ug usa sa mga plataporma alang sa duha ka nasod mao ang pagbinayloay og kahibalo ug may kalabutan nga kahanas.
Magdala kini sa Pilipinas og kahibalo gikan sa mga innovative energy technologies sa South Korea samtang ang Pilipinas mopaambit usab sa iyang kaugalingong kahibalo sa geothermal ug pumped hydropower generation.
Ingon man nga aduna pa’y daghang iladong institusyon sa enerhiya sa Korea ang moapil, lakip niini ang Korea Energy Economics Institute (KEEI), Korea Advanced Institute of Science and Technology (KAIST), Korea Trade-Investment Promotion Agency (KOTRA), ug Korea Hydro & Nuclear Power (KHNP).
Samtang ang Asia Economic Development Committee (AEDC) sa S. Korea maoy nagdumala sa pagpatuman sa programa dinhi sa Pilipinas.
Gihimug-atan ni Department of Energy Undersecretary Alessandro O. Sales, ang kamahinungdanon niini nga inisyatiba sa pag-umol sa mga polisiya sa enerhiya ug pagpalambo sa mga institusyon.
Gipasiugda niya nga ang mga panabot gikan sa KSP makatabang sa pagporma sa mga palisiya ug pagpatuman sa mga bag-ong solusyon sa enerhiya nga angay alang sa padayong nag-uswag nga mga panginahanglanon sa nasud.
Sa laing bahin, si Senador Sherwin Gatchalian, kinsa mitambong sa maong kalihukan, naghisgot usab nga ang South Korea makabenepisyo sa kasinatian sa Pilipinas sa geothermal ug hydropower, samtang ang Pilipinas makakuha ug bililhong kahibalo gikan sa Korea sa mga dapit sama sa smart grids, battery storage, ug nuclear energy.
Ang 2024/25 KSP nagtutok sa pagsulbad sa mga mahinungdanong prayoridad sa enerhiya, lakip ang pagpalapad sa imprastraktura para sa mga de-koryenteng sakyanan, renewable energy integration, grid modernization, ug advanced battery storage systems.
Ang Pilipinas nagtinguha sa 35% nga bahin sa renewable energy sa 2030.
Ubos sa KSP, ang Pilipinas misumiter og tulo ka nag-unang sugyot: pagpadali sa pagsagop sa mga de-koryenteng sakyanan, paghiusa sa floating solar ug smart grid technologies, ug pagpausbaw sa capacity-building initiatives alang sa clean energy development.
