CEBU CITY- Nihimo og emergency landing balik sa Mactan-Cebu International Airport ang usa ka flight sa Cebu Pacific Air nga padulong sa Manila karong Sabado sa buntag, Marso 8, 2025.
Matod sa Civil Aviation Authority of the Philippines (CAAP), ang Cebu Pacific Air Flight CEB588 adunay malfunction sa landing gear hinungdan nga napugos kini sa pagbalik.
Luwas nga mitugpa ang ayroplano mga alas 5:30 sa buntag ug ang tanang pasahero ug tripulante anaa sa maayong kahimtang.
Ang ayroplano nagdala sa 162 ka hamtong ug usa ka bata.
Sa Facebook post, ang pasahero nga si Remton Siega Zuasola misulat: “BRACE FOR IMPACT Just survived an emergency landing due to landing gear failure. Nauyog pero okay ra. Daghang Salamat Ginoo!”
Samtang si MCIA Assistant General Manager Atty.Glenn Napuli ug MCIAA Public Affairs Division Manager Mary Ann Dimabayao, nitaho nga ang Cebu Pacific, subay sa protocol, maoy mopagawas sa opisyal nga pamahayag kalabot sa insidente.
Sumala sa mga pasahero, gimandoan sila sa mga tripulante nga tangtangon ang mga mahait nga butang gikan sa imong lawas, ibutang ang mga kamot sa luyo sa imong ulo, ug mag-andam alang sa epekto.
Subay sa pakighinabi sa Bombo Newsteam kang Jovanie Corro, ang Traffic sa Nerve Command Center sa MCIAA, gitino niini nga ang ayroplano kinahanglan nga maglibot sa MCIA sulod sa 20-ka minutos aron masunog ang gasolina ug makunhuran ang peligro sa sunog sa pag-landing niini.
Dugang pa, nga ang sensor sa ayroplano napakyas sa pag-detect sa landing gear.
Hinungdan, nga gitambagan sa command center ang mga ayroplano nga motuyok kaduha, ug sa pag-abot niini sa Barangay Basak sa dakbayan sa Lapu-Lapu, ang landing gear gipakatap, nga nagtugot sa usa ka emergency landing.
Sa pagsulat ning balita, wala pay opisyal nga pamahayag ang Cebu Pacific.
