Gikabutyag ni Atty. Rodel Taton usa ka eksperto sa internasyonal nga balaod, nga usa ka ‘give and take’ ang nahitabo tali sa Pilipinas ug sa International Criminal Police Organization (Interpol), human sa pagkasikop ni kanhi Presidente Rody Duterte.
Matod ni Taton, importante nga tumanon sa Pilipinas ang pasalig niini sa Interpol tungod kay kabahin kini sa katungdanan sa nasud isip sakop sa International Police.
Pinaagi niini, matod niya, makalaom usab ang Pilipinas nga tabangan kini sa Interpol sa mga panahon nga nanginahanglan ang nasud og tabang, sama sa pagsikop sa mga pugante nga nanago sa ubang kanasuran.
Dugang pa ni Atty. Taton, nga kon wala pa gihatag sa Pilipinas ang ‘kooperasyon’ nga gipangayo sa Interpol, seguradong adunay epekto kini sa kung unsa ang pagtratar sa nasud sa Pilipinas, ilabi na sa mga higayon nga ang nasud nakigsabot sa laing nasud.
Matod niya nga posibleng magpanuko ang ubang kanasuran sa pagpakigsabot sa Pilipinas kay mopatim-aw nga ang nasud wala motuman sa mga obligasyon niini bisan pa sa gipirmahan nga kasabutan.
Matod ni Atty. Hinuon, aduna usab kini epekto sa ubang sektor sama sa ekonomiya sa nasud tungod kay seguradong makapalig-on kini sa pagsalig sa international community sa nasud.
