Nihangyo ang pamilya sa upat ka giingong biktima sa Duterte drug war sa National Bureau of Investigation (NBI) nga imbestigahan ang giingong online harassment nga gilabay kanila.
Gitabangan sa National Union of Peoples’ Lawyers (NUPL) ang mga pamilya aron pormal sa paghangyo sa NBI alang sa makuting imbestigasyon nga gikatahong misamot sukad sa pagkasikop ni kanhi Presidente Rodrigo Duterte, hapit usa ka buwan ang milabay.
Sumala sa NUPL, ang sunod-sunod nga mga pag-atake migamit og lain-laing mga pamaagi sama sa gi-edit nga mga hulagway, hinimo-himo nga mga istorya, hate speech, disinformation o peke nga balita, ug uban pa, ug ang tanan gidesinyo sa pagdaot sa pamilya sa mga biktima.
Gawas sa mga biktima, nakadawat usab og halapad nga online harassment ang mga abogado nga nagrepresentar kanila.
Nagtuo ang NUPL nga ang mga naghimo sa maong pagpanghasi puro nga mga tigpaluyo sa kampo ni kanhi Pres. Duterte ug mga bayarang troll nga moatake sa tanan nga dili mouyon sa ilang pagtuo o baruganan.
Gipaniguro sa grupo sa mga abogado nga dili sila magpakahilom ug mapugos sa pagpakigbatok sa sunod-sunod nga harassment ug online disinformation, gamit ang kamatuoran.
Giangkon sa grupo nga nakatabang sila sa pagsiguro sa katapusang pagdakop sa kanhi presidente ug dili mohunong hangtod nga mahatag ang hustisya.
