CEBU CITY-Gidayeg sa pangu sa Cebu City Human Resource and Development Office (HRDO) nga si Henry Tomalabcad ang mga empleyado sa kagamhanang dakbayan sa Sugbo nga wala malambigit sa pagpangampanya karong campaign period sa umaabot nga piniliay sa Mayo 12, 2025.
Kini ang gibuhian nga mga pamahayag ni Tomalabcad human gitaho niini nga walay bisag-unsang reklamo ang miabot sa iyang buhatan kabahin sa electioneering ug bisan unsang matang pagpang-endorso sa mga politikanhong kandidato nga subling magpapili sa nagsingabot nga eleksyon.
Kini nanukad sa mando gikan sa Civil Service Commission (CSC), Commission on Elections (Comelec), ug mismo sa usa ka resolusyon nga gipasar sa Cebu City Council nga likayan ang pagpa-ambit og campaign-related activities sulod ug gawas sa City Hall.
Gani nagpahigayon sab og panagtigom ang mga kadagkoan sa kagamhanang dakbayan ug sa Comelec nga girepresetahan ni Atty. Ferdinand Guijilde aron sa pagpahimangno sa ilang sakop sa maong lagda sa balaod sa piniliay.
Ang masakpang empleyado sa City Hall kay mag-atubang og tukmang silot nga suspensyon sa trabaho sulod sa 1 hangtod sa 6 ka buwan sa 1st offense ug termination of employment sa 2nd offense.
