Naglunsad ang United Nations og donation drive sa pagsuway nga makatigom og kinatibuk-ang $275 milyones o labaw pa nga hinabang alang sa mga biktima sa magnitude 7.7 nga linog sa Myanmar.
Matud sa UN, ang matigom nga pondo kay gamiton aron matabangan ang mga tawo nga grabeng naapektuhan sa kaylap nga pagrtay-og sa yuta diin pipila ka mga dapit ang nakasinati og sakit, pakutoy sa tiyan, ug walay mapuy-an.
Unang gitaho sa UN nga kinahanglan nga maabot og $1.1 bilyon nga pondo, basi sa inisyal nga humanitarian aid nga plano alang sa gibanabana nga 5.5 milyon nga mga tawo nga naapektuhan.
Apan, giingong hangtod sa singko porsiyento lang niini ang nahatagan og pundo.
Tungod sa nagkadako nga panginahanglan sa mga biktima sa linog, ang UN miingon nga dugang nga mga kahinguhaan ang gikinahanglan alang sa tabang.
Hinungdan nga ang bag-ong inisyatiba kay nagpunting sa 1.1 milyon nga ‘vulnerable people’ sa Myanmar, diin kadaghanan mga bata ug babaye nga gikataho nga nag-atubang sa gender-based violence, food insecurity ug kakuwang sa igong pag-access sa reproductive health.
Sa pagkakaron, adunay 6.3 ka milyon nga mga tawo sa Myanmar ang nanginahanglan og dugang nga tabang, nga lagmit modaghan samtang nagpadayon ang lisud nga kahimtang sa mga biktima.
