MANDAUE CITY-Miduso og kasong kriminal ang buhatan sa National Bureau of Investigation – Central Visayas Regional Office (NBI-Cevro) batok sa usa ka residente sa dakbayan sa Mandaue human nagpatuyok og sayop nga kasayuran online kalabot sa Skywalk Project sa Barangay Maguikay ni Lone District Rep. Emmarie “Lolypop” Ouano-Dizon.
Napasaka ang maong kaso niadtong Abril 10 diin ang respondent kay mao si Redmon Colina nga usa ka lumulupyo sa Barangay Centro sa samang dakbayan diin ang Facebook Account niini nga tinubdan sa maong sayop ng taho.
Kasong kalapasan sa Republic Act No. 10175 o ang Cybercrime Prevention Act of 2012 ang atubangon niini partikular na ang computer-related forgery ubos sa Section 4 (paragraph “b” subparagraph “1”) ug cyberlibel ubos sa Section 4 (paragraph “c” subparagraph “4”) sa maong balaod.
Matod sa NBI-Cevro nga gigamit sa respondent ang iyang Facebook account sa pag-circulate sa fake quote sa group nga “Mandaue Politics”.
Gikumpirmar sab niini nga present sa maong kaso ang elements constituting cyberlibel.
Kahinumduman nga niadtong Marso 12 kay gi-inagurahan ang bag-ong tukod nga skywalk sa Sitio Sudlon, Barangay Maguikay sa dakbayan sa Mandaue human giilisna ang daan naguba na nga istruktura tungod sa aksidente niadtong Marso 2023.
