CEBU CITY- Subling gipahinumdoman sa Cebu City Office of the City Markets (OCM) ang mga vendors sa city’s public markets sa dakbayan sa Sugbo nga dili pahimuslan ang mga konsumidor ug dili magpanikas sa ilang halin ilabi na sa ilang timbangan.
Kini subay sa datus sa OCM nga nasakmit nila ang 69 ka mga depektoso ug dili rehistrado nga mga timbangan sa miaging mga buwan sa Pebrero ug Marso ning tuiga.
Matod ni John Paul Amores, hepe sa OCM Research, Planning, Monitoring and Development Section, nga ilang tarungon ang pagbaligya sa mga vendors aron dili mailad ang mga konsumidor sa mga merkado sa dakbayan.
Dugang pa, kasagaran sa mga depektosong timbangan nga ilang nasakmit pinaagi sa reklamo sa mga konsumidor gikan sa Carbon Public Market sa may dalan Escaño paingon sa El Filibusterismo Street.
Tataw nga gawas sa ilang Operation Timbangan, gimintinar usab sa OCM ang kalimpyo sa mga merkado sa dakbayan.
Laing inisyatiba sa buhatan alang sa satellite markets sama sa Pardo Public Market, Ramos Public Market, T. Padilla Public Market, Pasil Public Market, ug Taboan Public Market.
