Nipasidaan ang Pakistan sa posibleng maglunsad og usa ka opensiba sa military ang India sulod sa 24 ngadto sa 36 ka oras, gamit ang bag-o nga pag-atake sa Indian Kashmir isip usa ka “peke nga pasangil.”
Kini human nakadawat sila og credible intelligence, diin sumala ni Information Minister Attaullah Tarar, nga aduna siya’y piho nga kasayuran nga ang India nagplano sa usa ka opensiba, gamit ang insidente sa Pahalgam isip usa ka pasangil, apan bisan paman ana kay mipasalig kini nga ila kining tubagon ang bisan unsang agresyon.
Gihimakak sa Islamabad ang bisan unsang pagkalambigit sa pag-atake nga mipatay sa 26 ka mga tawo sa Kashmir kaniadtong miaging semana, samtang nanawagan alang sa usa ka neutral nga imbestigasyon.
Apan, bisan paman sa mga panawagan kay nagpadayon gihapon ang tension tali sa duha ka nuclear-armed na nasud.
Agi’g tubag sa insidente, temporaryo nga gisuspinde sa India ang Indus Waters Treaty samtang gisirhan sa Pakistan ang airspace niini sa mga airline sa India.
Samtang, ang Punong Ministro sa India nga si Narendra Modi misaad nga silotan ang mga nagpaluyo sa pag-atake ug ang ministeryo sa langyaw sa India nagdumili sa pagkomento.
