PROVINCE OF CEBU- Gituki ni Presidente Ferdinand Marcos Jr. ang pipila ka mga kalamposan, kalambuan, ug rason nganong nahimong sumdanan ang Probinsiya sa Sugbo sa iyang P20 matag kilo nga programa sa bugas, sa Lungsod sa Dumanjug, gahapon Mayo 5, 2025.
Kung diin, iyahang gidayeg ang ekonomiya sa Sugbo, nga nitubo og 5.7%, tungod sa pag-uswag sa investment-friendly nga mga programa ug inisyatiba sa probinsiya.
Gikutlo usab niya ang 97.1% nga rate sa pagpanarbaho, nga nagpakita nga 2.9% na lamang sa populasyon ang nagpabilin nga walay trabaho.
Ang Sugbo, sa gitumbok sa Presidente, maoy nagduso sa paglambo sa ekonomiya sa Central Visayas, diin dako kaayo kini ug nakatampo sa padayon nga 7.3% nga pagtubo sa ekonomiya sa nahisgutang rehiyon.
Dugang niini, iyang gitumbok usab ang Kadiwa Center, diin adunay pito (7) kabuk sa Sugbo, nga nahimong usa sa mga sentrong pagpatuman sa P20 nga kilo sa bugas.
Gihatagan niini ug gibug-aton, nga ang Central Visayas o Cebu maoy unang nipatuman sa 20kg nga bugas kay matod niya, andam na ang sistema sa Sugbo, ug aduna nay mga ID’s.
Gipasabot usab niya ang rason nganong sukad sa iyang paglingkod sa katungdanan, karon pa lang gipatuman ang iyang saad, diin kini gumikan kay aduna pay mga butang nga kinahanglang ihan-ay ug ayohon alang sa mga mag-uuma sama sa paghatag og mga makina ug processing centers.
Dugang pa ni Marcos, nga ang gobyerno mosagop sa sistema nga gigamit sa lalawigan sa Sugbo alang sa mas organisado nga rollout sa “Benteng Bigas Meron (BBM) Na” o ang P20 matag kilo sa bugas.
Matod niya nga maglambigit kini og “smart application” alang sa pag-apod-apod og P20/kg bugas sa mga Pilipino.
