CEBU CITY- Gitubag ni Senador Raffy Tulfo si Cebu Governor Gwendolyn Garcia human siya gitawag niini nga ignorante sa balaod, nunot sa iyang pagsaway sa pagpaningil og bayad sa mga pasahero nga naggamit og pampublikong pansayan sa Cebu North Bus Terminal—usa ka aksyon nga matod niya klarong nakalapas sa Republic Act 11311.
Sa usa ka Senate committee hearing video nga gi-post sa iyang social media account, si Tulfo, kinsa nangulo sa Senate Committee on Public Services, nipasiugda nga daghan siyag naobserbahan nga mga kalapasan sa CNBT.
Bisan og wala niya hisgoti si Garcia sa committee hearing video, una na gisaway kaniadto ni Garcia ang pag-inspeksyon ni Tulfo sa CNBT ug ang iyang mga pasangil sa mga kalapasan sa terminal nga gidumala sa Kapitolyo.
Atol sa pagdungog sa Senado, gikutlo ni Tulfo ang Republic Act 11311, nga nailhan usab nga “Act to Improve Land Transportation Terminals, Stations, Stops, Rest Areas, and Roll-on/Roll-off Terminals,” nga naghatag ug mga pagpaayo niini nga mga pasilidad ug nagdili sa pipila ka mga kalihokan.
Giawhag ni Tulfo ang Department of Transportation (DOTr) ug ang LTFRB nga susihon ang terminal.
Gipasabot ni Tulfo nga ang mga terminal kinahanglan nga dili maningil alang sa paggamit sa mga regular nga kasilyas, apan namatikdan nga ang balaod nagtugot sa pagpaningil alang sa mga premium nga komportable nga mga lawak, basta kini bulag ug klaro nga gitanyag isip usa ka upgraded nga serbisyo.
Si Senador Raffy Tulfo nihatag og ehemplo atol sa pagdungog sa Senado nga kon ang usa ka comfort room adunay air-conditioned, ang mga pasahero mahimong maningil sa paggamit niini, tungod kay kini kuwalipikado isip usa ka premium nga serbisyo.
Gihatagan usab niya og gibug-aton nga kinahanglang seguraduhon ang kaluwasan dili lang sa mga drayber kon dili lakip na sa mga pasahero hinungdan nga gimandoan ang LTFRB sa pagbutang og mga glass breaker aron magamit kini sa tanan kung adunay emerhensiya.
Kalabot niini, gimanduan usab sa LTFRB ang regional director sa Central Visayas sa pag-isyu og show-cause order base sa findings ni Tulfo atol sa iyang inspeksyon.
