CEBU CITY- Nipasalig si outgoing Cebu City Mayor Raymond Alvin Garcia sa mga empleyado sa City Hall sa “smooth transition” o hapsay nga pagbalhin ngadto sa umaabot nga administrasyon, kini iyahang pamahayag atul sa Flag Raising Ceremony sa Cebu City Hall Plaza Sugbu karung adlawa Lunes, Mayo 19, 2025.
Kini ang unang higayon nga namulong siya atubangan sa mga empleyado sa City Hall sukad niadtong Mayo 12 nga midterm elections.
Dinhi, si Garcia midawat sa iyang kapildihan ni Mayor-elect Nestor Archival ug namalandong sa kinaiya sa serbisyo publiko ug liderato.
Gihatagan niini og gibug-aton, nga ang pagkapildi sa eleksiyon kinahanglang tan-awon nga kahigayonan sa paglambo.
Gidugang niini, nga kini usa ka kadaugan o usa ka kasinatian sa pagkat-on.
Gipaabot usab sa outgoing mayor ang iyang pahalipay ngadto kang Archival ug sa mga bag-ong napiling opisyal sa dakbayan sa Sugbo.
Nanghinaut kini, nga adunay kaalam, kaisog, ug pasensya alang sa trabaho sa unahan, ilabi na kang Mayor-elect Nestor Archival.
Nanawagan si Garcia sa mga empleyado sa City Hall nga mohatag sa ilang hingpit nga suporta sa umaabot nga administrasyon aron maseguro ang pagpadayon sa serbisyo publiko ug pagdumala.
Si Archival gikatakdang mu-asumer sa katungdanan karong Hulyo 1, 2025.
