Gianunsyo ni US President Donald Trump ang pagpili sa disenyo para sa proyektong “Golden Dome” nga usa ka $175 bilyon nga missile defense shield nga gitumong sa pagpanalipod sa America gikan sa mga hulgang-militar gikan sa China ug Russia.
Gipili usab niya ang US Space Force General Michael Guetlein nga manguna sa maong proyekto.
Ang Golden Dome nagtumong sa paghimo og gatusan ka mga satellite aron makit-an, masubay, ug ma-intercept ang mga umaabot nga missile nga muatake sa teritoryo.
Gihulagway ni Trump nga susama kini sa Star Wars defense system ni kanhi US Pres. Ronald Reagan nga mas abante lang og technological capabilities.
Giingon sab sa Canada nga interesado usab kini nga mahimong bahin sa proyekto isip bahin sa gipalig-on nga relasyon sa North American Aerospace Defense Command (NORAD).
Samtang sa pikas bahin, ang mga eksperto ug mga magbabalaod kay nagduhaduha sa maong sugyot diin sumala sa Congressional Budget Office, ang proyekto mahimong mokantidad ug $831-bilyones sulod sa 20 ka tuig.
Pipila ka mga military contractors ang mamahimong makakuha niini nga proyekto sama sa SpaceX ni Elon Musk, Palantir, Anduril, L3Harris, Lockheed Martin, ug RTX.
Bisan pa kung adunay gisugyot nga $25-bilyones nga inisyal nga pondo, kini naka-angkla sa usa ka kontrobersyal nga balaudnon sa pagpasig-uli sa Kongreso, nga mahimo’g makapahinay sa tibuuk nga proyekto.
