CENTRAL VISAYAS- Nakagraduate na gahapong adlawa, Hunyo 20, 2025, ang mga police trainees sa Batch 2024 “Legions” sa Public Safety Basic Training Course sa Regional Training Center 7, nga nahimutang sa Camp Jesse Robredo, Brgy. Jugan, Consolacion, Cebu, diin gihimo ang ilang Graduation Ceremony.
Anaa sa 601 ka mga bag-ong pulis ang migradwar karon, human nila makumpleto ang maong training course nga usa ka panginahanglanon aron mahimong opisyal nga miyembro sa kapulisan.
Kung diin, ang klase gipangulohan sa ilang class valedictorian nga si Patrolman (PAT) Prince Mark Cuizon, nga midaug sa maong dungog tungod sa iyang kaanindot nga performance sulod sa training.
Subay niini, nahinabi sa Bombo News team ang Inahan sa Rank-1 nga Police Major Mary Lou Cuizon, usa usab ka pulis, diin iyang gipadayag ang iyang dakong kalipay ug garbo nga nahimong class valedictorian ang iyang anak. Giila niya kini nga usa ka dako kaayong dungog dili lamang para sa ilang pamilya, apan usab alang sa serbisyo publiko nga ilang gialagaran.
Gidugang pa niya nga bisan pa man og pareho silang mga pulis sa iyang bana, wala gyud nila gipugos ang ilang anak nga mosunod sa ilang propesyon. Apan dako ang ilang kalipay nga sa katapusan, gisunod gihapon niini ang ilang mga yapak isip usa ka alagad sa balaod.
Kung diin, mitambong si Police Regional Office 7 Regional Director, Police Brigadier General (PBGEN) Redrico Maranan, nga mitunol sa iyang mensahe sa mga graduates, nag-awhag kanila nga ipadayon ang integridad, disiplina, ug tinuoray nga serbisyo sa katawhan.
Gipangulohan ang maong hinungdanong kalihokan ni PCOL Greg Soliba, Chief sa Regional Training Center 7, diin iyang gipasiugda nga nakat-on ang mga trainees sa bili sa pagsalig sa publiko, ang responsibilidad nga nag-uban sa ilang badge, ug ang kahinungdanon sa pagpanalipod sa katungod sa tawhanong katilingban. Sa ilang pagpadayon sa Public Safety Field Training Program, ilang gidala dili lang ang kahibalo, apan usab ang kusgan nga pagbati sa katuyoan, responsibilidad, ug tinuoray nga pagserbisyo.
Dugang niini, nga kini na usab ang pinakaulahi nga graduates sa Kapulisan nga adunay nag gikan sa Negros Island ug Siquijor kana gumikan kay gibulag naman sila sa Region 7.
Ang graduation usa ka simbolo sa panibag-ong hugna sa kinabuhi sa mga trainees, nga karon opisyal nang kabahin sa pwersa sa kapulisan nga nagserbisyo alang sa kalinaw ug kaluwasan sa rehiyon ug sa nasud.
