PROVINCE OF CEBU—Gikwestyon sa kampo ni Cebu Governor-elect Pamela Baricuatro ang disqualification case nga gipasaka batok kaniya tungod sa giingong illegal election survey.
Matod ni Atty. Ferdinand Topacio, legal counsel ni Baricuatro, ma-dismiss gyud ang kaso kay walay labot ang iyang kliyente sa maong isyu.
Gitataw ni Topacio nga tulo ka seryusong rason ang nakapaluya sa reklamo, usa na niini ang giingong sayop nga proseso sa pagpasaka sa kaso.
Gituohan sa kampo ni Baricuatro nga politikanhon ang motibo sa reklamo aron lang dauton ang iyang kadaogan.
Gipasabot sa abogado nga ang reklamo gisang-at sa COMELEC-7 Regional Director nga giingong supak sa Omnibus Election Code.
Matod niya ang maong mga kaso kinahanglang ipasaka pinaagi sa Clerk of the Commission o sa Law Department sa COMELEC, ug dili sa regional office.
Gumikan niini, nagtuo si Topacio nga walay igong basehanan ang maong reklamo ug tataw nga usa kini ka pagsuway sa pagbaliwala sa lehitimong kadaugan ni Baricuatro niadtong Mayo 12 nga midterm elections.
Kung kahinumduman, nga ang kontrobersiya naggumikan sa Mayo 12, 2025 midterm elections, diin si Pamela Baricuatro migawas nga mananaog isip bag-ong napiling gobernador sa Sugbo.
Bisan pa, wala madugay pagkahuman sa mga botohan, usa ka kaso sa diskwalipikasyon ang gisang-at batok kaniya, nga nag-akusar sa mga iregularidad nga naglambigit sa usa ka dili awtorisado nga survey sa eleksyon nga mahimong nakaimpluwensya sa mga resulta.
Matod sa reklamo, ang maong survey giingong gipakatap nga walay saktong clearance ug posibleng nakalapas sa mga balaod sa eleksyon nga may kalabotan sa premature campaigning o pagmaniobra sa opinyon sa publiko.
Sa pagkakaron, wala pay pinal nga hukom ang Commission on Elections (COMELEC), apan ang kaso nagpadayon sa pagpukaw sa interes tungod sa posibleng implikasyon niini sa local political dynamics sa Sugbo.
