Sayong nangandam ang Philippine National Police (PNP) alang sa umaabot nga ikaupat nga State of the Nation Address (SONA) ni Presidente Ferdinand Marcos Jr., karong buwan sa Hulyo.
Si PNP Chief PGen. Nicolas Torre III ang mismong nikompirmar nga aduna nay mga inisyal nga dayalogo tali sa National Police ug partner agencies, lakip na ang Office of the Sergeant-at-Arms sa House of Representatives aron hisgutan ang seguridad sa umaabot nga SONA.
Bisan og wala mohatag ang hepe og insaktong ihap sa mga pulis nga idestino sa adlaw mismo sa SONA, gipasalig ni Torre nga prayoridad nila sa maong adlaw ang kalinaw ug kaluwasan sa publiko ug bisan sa mga nanambong.
Samtang, matod sa hepe, bisan sa nangaging mga SONA, daghan gihapong mga isyu nga masugatan sa ilang sakop bisan og aduna silay plano sa maong kalihukan.
Kalabot pa kini sa mga isyu sa politika, partikular na ang isyu sa impeachment ni Bise Presidente Sara Duterte, nga mahimong makaapekto sa dagan sa programa nianang adlawa.
Apan, gipasalig ni Torre nga padayon ang ilang pagmonitor, pag-follow up ug pag-apil niining mga matang sa sitwasyon sa ilang pagpangandam.|Bombo Irene Ardiente
