Kusganong gibarugan ni retired judge at Phippine Charity Sweepstakes Office (PCSO) Chairperson Felix Reyes sa tanang isyu nga gipasaka batok kaniya sa missing-sabungero whistleblower Alyas Totoy o Julie “Dondon” Patidongan.
Sa giluwatang pamahayag sa maong opisyal, iyang gihimakak ang tanang pasangil ni Alyas Totoy, dungan sa pagpadayag sa iyang kaandam nga mokooperar sa bisan unsang imbestigasyon sa nasangpit nga isyu.
Una nang giila ni Patidongan ang retiradong judge nga giingong nalambigit sa case-fixing sa business tycoon nga si Atong Ang, diin daw makapila na usab siya mibiyahe sa gawas sa nasud kauban ang daghang mga piskal ug kaubang mga maghuhukom aron ipahigayon case-fixing.
Hinuon, si Reyes niingon nga kining tanan bakak.
Gitataw ni Reyes nga kon dili makarepresentar ug makapamatuod si Patidongan sa iyang mga akusasyon, mas maayo nga magpakahilom na lang siya.
Sa samang higayon, gitugutan usab sa retiradong judge ang Bureau of Immigration sa pag-abli sa mga rekord sa matag internasyonal nga pagbiyahe nga iyang nahimo sukad nga miretiro siya sa hudikatura niadtong 2021.
Matod niya ang mga rekord magpamatuod gyud nga dili tinuod ang tanang pangangkon ni Alyas Totoy.
Gikwestiyon usab sa opisyal ang tayming sa pagpagawas sa mga alegasyon, nga matud niya nibuto usa ka adlaw human siya mi-file og aplikasyon alang sa posisyon sa Ombudsman.
Ingon man nga niinsistir si Reyes nga andam siya sa imbestigasyon sa bisan unsang ahensya sa gobyerno nga makapatin-aw sa tanang pasangil ug aron malimpyohan ang pangalan sa hudikatura ug prosecution service gikan sa mga pasangil.
