CEBU CITY- Nimando ang Philippine Amusement and Gaming Corporation (Pagcor) sa tanang online gaming operators nga tangtangon dayon ang ilang mga billboard ug uban pang sugal-related nga out-of-home (OOH) advertisements.
Sa usa ka memorandum nga gipagawas niadtong Huwebes, gibutyag sa Pagcor nga ang tanang lisensyado, suppliers, operators ug mga provider sa electronic games kinahanglan motuman sa mando nga epektibo na sugod karong Agosto 15.
Gisusi kini sa Bombo News Team pinaagi sa pakighinabi kang Ellen Maghanoy, chairperson sa Federation of Cebu Transport Cooperatives (FCTC), ilabi na nga daghang mga Public Utility Jeepneys (PUJs) ang adunay sugal-related ads sa likod sa ilang mga sakyanan.
Matod ni Maghanoy, dako kining tabang sa mga PUJ operators nga naglisod sa pagbayad sa ilang obligasyon, ilabi nga moabot sa Php 2,500 hangtod Php 3,000 ang makolikta nila sa matag buwan kada unit.
Tungod niini, nangayo sila og konsiderasyon sa Pagcor aron padayon nga makapangita og dugang kita ang mga drivers ug operators.
Apan, bisan pa man sa ilang hangyo, giila ni Maghanoy nga kung tumanon gyud ang lagda sa Pagcor ug sa LTFRB 7, andam silang mosunod.
Ang memorandum sa Pagcor misunod sa anunsyo sa Fintech Alliance Philippines – ang pinakadakong grupo sa digital payment ug e-wallet operators sa nasud – nga lig-onon nila ang internal controls aron malikayan ang walay pugong nga pag-access sa online gambling platforms.
Sa laing bahin, nagpahayag usab og kabalaka ang mga lider sa Simbahan ug pila ka mga mambabalaod, ilabi na sa epekto sa e-gambling nga nagdala sa pagkaadik, panalapi nga kalisod, ug negatibong epekto sa mga kabus, tungod kay sayon ug agresibo na kini karon nga ma-access.
