Nipasalig si Presidente Ferdinand Marcos Jr., nga andam ang gobyerno sa pagtubag sa bisan unsang panginahanglan sa mga katagilungsod gikan sa epekto sa Bagyong Crising.
Kini human personal nga gisusi sa Presidente ang bodega sa Department of Social Welfare and Development (DSWD) diin nagpadayon ang pag-repack sa mga family food packs nga ipang-apod-apod sa atong mga kababayan nga naapektuhan sa Bagyong Crising.
Matod sa Presidente, bag-ong makinarya ang gigamit sa pag-repack sa mga relief goods nga naglangkob sa nagkalain-laing health kits, sanitary kits, family dress kits ug cooking sets.
Ingon man nga tungod sa bag-ong makinarya, ang pag-repack nahimong mas paspas.
Gipakita usab ni Presidente Marcos ang mga balde nga adunay mga filter nga mahimong pun-an sa tubig nga bisan kung dili limpyo, mahimo’g mainom human sa pagsala.
Matod sa Presidente, ang mga balde nga adunay mga filter dako kaayog butang ilabi na panahon sa bagyo nga lisod ang pag-inom ug limpyo nga tubig tungod sa baha.
Sa pagkakaron, mga tulo ka milyon nga mga family food packs ang gireserba.
Gawas niini, adunay P2.9 bilyones nga standby funds ang DSWD aron kon gikinahanglan ang dugang pundo, mahimo kining makuha.
