Human makagawas sa Philippine Area of Responsibility (PAR), ang Bagyong Crising, mikusokuso dayon kini sa Hong Kong isip Bagyong Wipha diin adunay hangin nga kapin sa 167 kph.
Hinungdan nga nipagawas og advisory ang Embahada sa Pilipinas sa Vietnam alang sa mga Filipino, ilabina niadtong anaa sa amihanang bahin sa nasod, kalabot sa Bagyong Wipha (kanhi Crising), nga gipaabot nga mo-landfall karong buntaga.
Giawhag sa embahada ang tanan nga magmabinantayon, mosunod sa mando sa lokal nga kagamhanan, ug mangandam sa posibleng epekto sa bagyo.
Gitambagan usab ang mga Pilipino nga sundon ang mga taho sa panahon ug kontakon ang mga lokal nga awtoridad alang sa kinahanglan nga mga lakang sa kaluwasan.
Inanay na usab ang mga kadaot nga gidala sa Bagyong Wipha diin pipila ka mga punoan ang nangatumba ug uban pa.
Samtang, nakapahinabog dakog pagkabalda usab sa Hong Kong International Airport, nga adunay dul-an sa 500 ka mga flight ang nakanselar ug 100,000 ka mga pasahero ang apektado sukad niadtong Sabado.
Gipaambit usab sa general manager sa Airport Authority nga kapin sa 400 ka rescheduled flights ang gipaabot nga molarga o moabot sa Hong Kong kung gani mohuyang ug mopalayo ang bagyo.
