CEBU CITY- Giaprobahan sa Cebu City Council ang deklarasyon atol sa regular session niini niadtong adlawng Martes, Hulyo 22, nga nag-abli sa bahin sa P60 milyones nga Quick Response Fund (QRF) alang sa ikatulong quarter.
Ang hinanali nga tumong mao ang paghawan sa mga nabara nga mga suba ug pagpugong sa pagbalik sa nahitabo nga pagbaha nga nilubog sa pipila ka mga dapit sa tibuok siyudad.
Mikompirmar si Konsehal Dave Tumulak, ang proponent sa disaster resolution, nga ang alokasyon maglakip sa desilting operations sa tibuok siyudad base sa rekomendasyon sa Department of Engineering and Public Works (DEPW).
Mibutyag usab si Tumulak, nga ang deklarasyon sa kalamidad gibase sa nahitabong pagbaha niadtong Hulyo 16, nga gi-endorso sa CCDRRMC, aron ang siyudad maka-tap sa 30 porsiyento nga bahin sa QRF gikan sa P60 milyones nga budget sa third quarter, diin P15 milyones ang inisyal nga alokasyon alang sa desilting ug declogging sa mga suba ug agianan sa tubig.
Giklaro usab niini nga gikonsiderar ang pag-abang sa mga ekipo ilabi na human gipresentar sa usa ka provider ngadto kang Mayor Nestor Archival ang usa ka specialized amphibious desilting machine nga makahimo sa pag-operate sa mga suba.
Gitumbok usab ni Tumulak nga ang basura maoy usa sa nag-unang kontribusyon sa pagbaha.
Matod ni Tumulak nga si Cebu City Mayor Archival, mimando na sa Department of Public Services ug mga opisyal sa barangay nga higpit nga ipatuman ang ordinansa sa dakbayan bahin sa garbage segregation ug pagsuporta sa mga paningkamot sa pagpanglimpyo. | Bombo Nathaniel Sandoval
