Ang nangaging sunodsunod nga mga bagyong Crising, Dante, Emong ug ang hanging habagat nga mikusokuso sa nasod kay mikutlo og kinabuhi sa ihap nga nikabat na sa 30 ka tawo.
Suno kay Office of the Civil Defense (OCD) officer-in-charge Assistant Secretary Bernardo Rafaelito Alejandro IV, sa maong ihap, siyam ang na-validate isip mga fatalities gikan sa National Capital Region (NCR) ug duha sa Region III diin siya niingon nga kadaghanan sa mga nangamatay tungod sa pagkalumos o pagkakuryente.
Base sa datus gikan sa NDRRMC, adunay 3 ka patay matag usa sa Western Visayas, Negros Island Region ug Northern Mindanao.
Gikasubo sab niini kay adunay tag-usa ang namatay gikan sa MIMAROPA, Davao, Central Luzon ug Caraga regions diin pipila sa mga nangamatay kay grabe ang kahimtang ug usa sa mga patay ang nakuryentihan sa Bulacan ug duha ang naigo sa nangatumba nga mga kahoy sa Camiguin ug Surigao del Norte.
Sa laing bahin, sumala sa OCD, pito ka mga indibidwal nga gikataho gikan sa Western Visayas, Central Luzon, Metro Manila ug CALABARZON ang pabiling missing samtang 10 ang gikataho nga naangol.
Sumala sa datos gikan sa OCD, 5.2 ka milyon na ka mga tawo ang naapektuhan sa kusog nga ulan ug pagbaha.
Kini maoy hinungdan sa pagdeklarar og state of calamity sa 84 ka mga lugar sa nasod aron mapadali ang pagpagawas sa emergency funds ug pagpatuman sa price freeze sa mga nag-unang palaliton lakip na ang bugas.
