Gikatahong aduna gihapoy mga lugar sa nasud ang padayon nga gibahaan tungod sa hiniusa nga epekto sa mga bagyong Luis, Maymay, Neneng ug sa habagat-kasadpang monsoon.
Diin sa ulahing datos gahapon, Sabado, Agosto 22, anaa pa sa 574 ka mga lugar ang bahaan.
Sumala sa Office of the Civil Defense (OCD), ang tubig-baha labing menos usa ka tiil ang giladmon.
Ang Central Luzon ang adunay pinakadaghang mga lugar nga gibahaan nga mikabat sa 446. Diin ang rehiyon mao ang labing naapektuhan sa walay hunong nga pag-ulan sa miaging mga semana.
Gisundan kini sa Mimaropa nga adunay 42 ka mga lugar nga nakasinati gihapon og pagbaha. Sa Ilocos Region, 35 ka mga lugar; Sa Western Visayas, 26 samtang sa Calabarzon, 25 ka mga lugar.
Niining bahina, ang OCD miingon nga ang gobyerno nakahatag na og P1.1 bilyon nga kantidad sa tabang sa mga apektadong komunidad.
Gipahibalo sa information officer sa OCD nga si Diego Mariano nga nakigtambayayong na sila sa mga awtoridad aron masulbad ang nagpadayon nga pagbaha, labi na sa probinsya sa Pampanga.
