Gibanabana nga 8,000 ka mga tunghaan ug 6 milyon nga mga estudyante sa tibuok nasud ang naapektuhan sa ulan ug pagbaha nga gipahinabo sa sunod-sunod nga mga bagyo ug sa Southwest Monsoon o Habagat, sumala sa Department of Education (DepEd).
Ang mga bagyong Luis ug Maymay, uban sa gipakusog nga Habagat, hinungdan sa kaylap nga pagbaha ug pagdahili sa yuta.
Tungod niini, daghang mga lugar ang nagsuspende sa mga klase sulod sa pipila ka adlaw, nga nagpugos sa mga tunghaan sa pagbawi sa mga adlaw nga apektado ang klase.
Matod ni Education Secretary Sonny Angara, kini mga 1/5 sa kinatibuk-ang gidaghanon sa mga eskwelahan sa nasud. Bisan pa, ang mga report sa DepEd wala pa makompleto, busa ang gidaghanon mahimo pa nga madugangan.
Sumala sa kalihim, ang bag-ong three-term academic calendar naglakip na sa igo nga oras alang sa mga estudyante sa pagbawi sa mga adlaw nga adunay class suspensions.
Samtang sa pinakabag-o nga situational report sa DepEd, 217 ka mga eskwelahan ang gigamit gihapon isip mga evacuation center alang sa kapin sa 6,400 ka mga pamilya. Diin, gibanabana nga P32.69 milyon ang gikinahanglan alang sa mga operasyon sa pagpanglimpyo ug paghawan sa 1,157 ka mga eskwelahan.
Dugang pa, gikinahanglan ang P192.86 milyon para sa pag-ayo sa 3,936 ka nadaot nga mga eskwelahan, ug ang mga tunghaan nga labing apektadong natala mao ang sa Ilocos Region, gisundan sa Central Luzon ug Cordillera Administrative Region.
