Dili makahatag og bag-ong teaching positions ang Department of Education (DepEd) sa 2027 kung magpabilin ang kasamtangang gisugyot nga badyet, human ma-zero ang pondo alang sa pagkuha og mga bag-ong magtutudlo.
Gikumpirma kini ni Education Secretary Sonny Angara atol sa hearing sa House Committee on Appropriations gahapon Lunes.
Matud ni Angara, nanginahanglan ang DepEd og 14,274 ka dugang nga magtutudlo nga mokabat sa P4.29 bilyon, apan wala kini gilakipan og pondo sa 2027 National Expenditure Program (NEP).
Gilauman ni Angara nga maibalik ang pondo samtang nagpadayon ang deliberasyon sa nasudnong badyet.
Matud niya, nakahire ang DepEd og 32,000 ka magtutudlo karong tuiga, mas taas kaysa naandan nga 20,000 kada tuig.
Ang gisugyot nga 2027 budget sa DepEd mokabat sa hapit P976 bilyon, apan nangayo pa ang departamento og dugang nga P145.19 bilyon alang sa mga programa nga kulang o walay pondo sa NEP.
Tungod kay wala pa maaprobahan ang 2027 national budget, posible pa nga mausab ang alokasyon alang sa pagkuha og bag-ong mga magtutudlo.
