Miabot na sa P1.91 bilyon ang kadaot ug kapildihan sa sektor sa agrikultura tungod sa kusog nga Habagat ug sa mga bagyong Luis, Maymay ug Neneng, sumala sa Department of Agriculture (DA).
Base sa pinakabag-ong assessment sa DA, 61,237 ka mag-uuma ang naapektuhan, samtang kapin 54,611 ka ektarya nga umahan ang nadaot.
Gibanabana usab nga 7,772 metriko tonelada sa mga produktong agrikultural ang nawala sa produksiyon.
Pinakadako ang kadaot sa humay nga mikabat sa P1.07 bilyon, gisundan sa high-value crops nga P610.32 milyon.
Ang kadaot sa mais mikabat sa P92.68 milyon, samtang P23.62 milyon ang kapildihan sa kamoteng kahoy.
Nakaapekto usab ang mga katalagman sa kahayupan, pangisdaan, mga pasilidad sa irigasyon, farm structures, makinarya ug kagamitan.
Aron matabangan ang mga apektadong mag-uuma, nag-andam ang DA og P237.99 milyon nga agricultural inputs, lakip ang binhi sa humay, mais ug mga utanon.
Makakuha usab sila og pautang hangtod P25,000 ubos sa Survival and Recovery (SURE) Loan Program.
Samtang, maghatag ang National Food Authority og 3,631 ka sako sa ginaling nga bugas ngadto sa mga apektadong lokal nga gobyerno, samtang nagpadala usab ang DA og KADIWA trucks aron maghatod og mga produktong agrikultural ug relief supplies sa mga apektadong lugar.
