Naggahin ang Philippine Crop Insurance Corporation (PCIC) og P187 milyon aron magsilbing tabang sa mga insured nga mag-uuma nga naapektuhan sa grabeng epekto sa Habagat ug sa mga nangaging bagyo nga Luis, Maymay ug Neneng.
Ang mga payout magsilbing tabang alang sa natala nga mga pagkalugi gikan Agosto 1 hangtod 26, 2026 sa walo ka rehiyon, nga gilangkoban sa 24,987 ka mga mag-uuma nga makabenepisyo.
Sumala sa PCIC, ang mga mag-uuma sa humay ang gihatagan sa pinakadako nga bahin sa mga payout sa insurance, diin kini mikabat sa P132.9 milyon, ang mga high-value crops growers sa walo ka rehiyon gihatagan usab og P42.1 milyon ug samtang ang mga mag-uuma sa mais adunay usab P9.3 milyon.
Samtang, base sa pinakabag-o nga natala sa Disaster Risk Reduction and Management Operations Center sa Department of Agriculture (DA) niadtong Septyembre 6, ang kinatibuk-ang kantidad sa kadaot sa sektor sa agrikultura tungod sa mga kagubot sa panahon miabot sa P4.13 bilyon.
Basi sa rekord sa Departamento, 97,589 ka mga mag-uuma ug mangingisda sa 81,383 ka ektarya ang naapektuhan, ug samtang ang pagkawala sa produksiyon miabot usab sa 100,602 metriko tonelada.
Subay niini nga mga numero, ang bugas ang labing natala nga naapektuhan nga adunay kadaot nga mokabat sa P2.04 bilyon nga kapildihan.
