Nagpahayag og kabalaka ang pipila ka sektor sa gisugyot nga P198.45 bilyon nga badyet sa Department of Agriculture (DA) alang sa 2027.
Mas ubos kini og 8 porsyento o P17.25 bilyon kumpara sa P215.69 bilyon nga giaprubahan alang sa DA niadtong 2026.
Matud ni kanhi Agriculture Secretary Leonardo Montemayor, mahimong mameligro ang seguridad sa pagkaon tungod sa pagkunhod sa badyet, ilabina sa gipaabot nga epekto sa El Niño ug sa tensiyon sa Middle East nga makaapekto sa gasto sa produksiyon.
Gisugyot ni Montemayor nga hatagan og prayoridad ang lokal nga produksiyon imbes nga magsalig pag-ayo sa imported nga mga produkto.
Matud pa niya, ang sobra nga pag-abot sa imported nga produkto samtang anaa usab ang lokal nga ani mahimong makapahinabo sa pagkalugi sa mga mag-uuma.
Gihangyo usab niya ang Department of Justice nga pasakaan og kaso ang mga nalambigit sa smuggling ug misdeclaration sa mga produktong pang-agrikultura.
Gipasidaan ni Montemayor nga ang mga smuggled ug misdeclared nga produkto mahimong dili moagi sa tukmang inspeksyon, makapakunhod sa kita sa gobyerno ug posibleng magdala og mga sakit nga hulga sa panglawas sa publiko.
