MANDAUE CITY,CEBU- Mahimo nang maprotektahan ang mga drayber nga nalambigit sa mga disgrasya sa kadalanan nga sagad moresulta sa grabeng pagkaangol o pagkawala sa kinabuhi, kun ugaling sikopon nga walay pasiunang imbestigasyon ubos sa proposed ordinance nga gipasar sa unang pagbasa sa Konseho sa Dakbayan sa Mandaue niadtong Lunes, Hulyo 28, 2025.
Ang draft ordinance, nga nailhan usab nga “Anti-Illegal Arrest or Detention in Traffic Accidents Ordinance of Mandaue City,” nga nagtinguha nga mapanalipdan ang katungod sa mga drayber pinaagi sa pagdili sa ilang pagdakop o detensyon gawas lang kon adunay pormal nga imbestigasyon sa trapiko nga gihimo ug naestablisar ang ilang kasaypanan, pagpabaya, o pagkadili maayo.
Kung diin, ang ordinansa gi-author ni Konsehal Carlo Pontico Fortuna ug co-author ni Konsehal Andreo Ouano Icalina. Gihimug-atan niini nga walay motorista nga angayng kuhaan sa kagawasan sa arbitraryong paagi, nga nagpalanog sa mga probisyon sa 1987 Philippine Constitution ug mga hingtungdan nga nasudnong balaod, lakip ang Revised Penal Code ug ang Land Transportation and Traffic Code.
Ubos sa ordinansa, ang usa ka motorista mahimo lamang nga dakpon o mapriso kung adunay usa ka pormal nga imbestigasyon sa trapiko nga gihimo ug ang mga nahibal-an klaro nga nagpamatuod nga ang motorista ang adunay sala, mahimo’g usa ra nga responsable o makigbahin sa responsibilidad sa laing partido nga nalambigit sa aksidente sa trapiko.
Ang mga tigpatuman sa balaod nga makalapas sa ordinansa mahimong mag-atubang og silot nga hangtod sa P5,000, dugang sa ubang mga obligasyon sa sibil, penal, o administratibo.
Mibutyag usab si Fortuna, nga ang mga motorista nga dili supak sa balaod nga gidakop o gitanggong kinahanglang buhian dayon, gawas kon ang mga tigpatuman sa balaod makagamit ug laing balido nga legal nga basehan alang sa detensyon base sa kasamtangang mga balaod.
Ang ordinansa usab naghubit sa mahinungdanong mga termino sama sa reckless imprudence ug simple imprudence, ug nag-ingon nga kini magdugang sa nasudnong mga balaod gawas kon makita nga dili uyon niini.
Kining gisugyot nga ordinansa gitakda na karon alang sa dugang deliberasyon sa mosunod nga mga sesyon sa Sangguniang Panlungsod ug alang sa public hearing.| via Bombo Nathaniel Sandoval
