PROVINCE OF BOHOL- Nasikop ang usa ka kanhi miyembro sa Philippine Army ug ang kauban niini sa gihimong anti-illegal drug operation sa Purok 1, Barangay Bil-isan, lungsod sa Panglao, lalawigan sa Bohol.
Giila ang mga nadakpan nga sila si William Guirit, alyas “Liam”, 42 anyos, kanhi corporal sa Philippine Army nga na-dismiss sa serbisyo, ug si Oliver Cuaco, 45 anyos, lumolupyo sa Barangay Looc, Panglao.
Nakuha gikan sa duha ang dagkong pakete sa gituohang shabu nga gibanabanang 80 ka gramos ang gibug-aton ug nagkantidad og P544,000. Apil usab sa narecover ang usa ka 9mm nga pistola nga adunay usa ka bala ug ubang mga non-drug items.
Ang maong operasyon gipasiugdahan sa Provincial Intelligence Unit ug Provincial Drug Enforcement Unit sa Bohol Police Provincial Office.
Sa pakighinabi sa Bombo Newsteam kang Plt.Col. Norman Nuez, ang tigpamaba sa Bohol Police Provincial Office, nga sa imbestigasyon sa PIU, misulod sa serbisyo militar si Guirit niadtong 2008 apan na-dismiss niadtong 2016 human masangkot sa ilegal nga droga.
Giila usab kini nga high value individual sa probinsya, diin ang iyang gigikanan sa suplay sa droga gituohang gikan sa usa ka preso sa penal colony nga wala giluwatan sa kapulisan ang lokasyon.
Gidugang sa kapulisan nga nagkadako ang drug network ni Guirit, diin giila nga iyang downline si Oliver Cuaco, ug ilang gipalapdan ang operasyon sa halos tanang lugar sa unang distrito sa lalawigan, labi na sa isla sa Panglao.
Napamatud-an nga makabaligya sila og kapin 100 gramos nga shabu matag semana nga ipanagtag ngadto sa mga drug pushers sa matag lungsod sa unang distrito.
Tungod niini, gipasakaan sila og kaso ubos sa Section 5 nga may kalabutan sa Section 26(b) ug Section 11 sa Article II sa Republic Act 9165 o Comprehensive Dangerous Drugs Act of 2002, ug RA 10591 nga nagdili sa ilegal nga pagpanag-iya og armas.
