Nanawagan ang kapin sa 1,900 ka asosasyon ubos sa United Fisherfolks and Urban Poor (UNITED) ang nanawagan sa gobyerno sa Dakbayan sa Sugbo nga hunongon ang mga demolisyon ug sigurohon ang tinuod nga partisipasyon sa publiko sa usa ka proyekto sa DPWH nga ilang giingong wala’y klarong konsultasyon.
Sa pakighinabi sa Bombo Newsteam kang Charmelyn Villegas, ang Council Leader sa United Fisherfolks and Urban Poor (UNITED), gipaambit niini, nga ang grupong United Fisherfolks and Urban Poor (UNITED), nga nagrepresentar sa mga residente gikan sa barangay Alaska Mambaling, Basak San Nicolas, Cogon Pardo, ug Inayawan, nanawagan sa mga awtoridad sa gobyerno nga hunongon ang mga demolisyon, pagsiguro sa tinuod nga partisipasyon sa publiko, ug panalipdan ang ilang mga panimalay ug panginabuhian.
Gibutyag pa nga ang pagpang-demolish wala misunod sa hustong legal nga proseso ug walay klarong relokasyon.
Gidugang ni Emilia Englatera nga apektado ang mga kabus nga pamilya sa syudad ug baybayon tungod sa kakulang sa transparency ug suporta sa proyekto.
Tungod niini, misumiter og pormal nga apela ang UNITED sa lokal nga konseho aron magpatawag og public hearing uban sa DPWH, DWUP, ug PCUP.
Ilang gipasiugda ang inklusibong kalamboan, pagpanalipod sa katungod, ug pagpugong sa demolisyon hangtod adunay klarong plano sa relokasyon ug serbisyo.
Sa ilang panapos nga mensahe, nanawagan ang komunidad nga ang kalamboan kinahanglan walay mabiyaan.
