Gikabutyag sa mga kapulisan sa Britanya nga aduna silay 365 ka mga indibidwal nga gisikop sa Central London niadtong Sabado, kini human nakalapas sa balaod ang mga tigpaluyo sa usa ka bag-o lang gidili nga pro-Palestinian, isip kabahin sa ilang paningkamot nga pugson ang gobyerno sa pagkonsiderar pag-usab mahitungod sa ban niini.
Kahinomdoman nga sa sayo palang sa buwan sa Hulyo, ang Parliament niduso og balaudnon nga i-ban ang Palestine Action ug ihimong usa ka krimen ang pagsuporta sa publiko sa nasangpit nga organisasyon.
Ang maong balaudnon naduso human ang mga aktibista nisulod sa usa ka base sa Royal Air Force ug gidaot ang duha ka tanker nga eroplano aron magprotesta batok sa suporta sa Britanya alang sa opensiba sa Israel batok sa Hamas sa Gaza Strip.
Diin, ang mga tigpaluyo sa grupo nagpahigayon og sunod-sunod nga mga protesta sa palibot sa U.K. sa niaging bulan, nangatarungan nga ang balaod iligal nga nagpugong sa freedom of expression.
