MANDAUE CITY,CEBU- Nakasakmit og gibana-banang 2.5 kilos sa gituohang shabu nga nagkantidad og P17 milyones pinaagi sa hiniusang operasyon sa City Intelligence Unit/City Drug Enforcement Unit Mandaue City Police Office, Regional Intelligence Division(RID)-7, Regional Police Drug Enforcement Unit (RPDEU)-7, Special Operations Unit (SOU)-7 PNP Drug Enforcement Group ug Philippine Drug Enforcement Agency(PDEA)-7 gikan sa laing Regional Level high value individual.
Giila ang suspetsado sa alyas nga Cali, 35-anyos kinsang nadakpan sa Sitio Uniwide, Barangay Tipolo, Dakbayan sa Mandaue niadtong Agosto 9 ning tuiga.
Sa pakighinabi sa Bombo News Team kang PLTCOL Mark Gifter Sucalit, Chief sa City Intelligence Unit, MCPO gipaambit niini nga kanhi traffic enforcer sa dakbayan sa Sugbo ang nadakpan nga suspek.
Gawas sa nakuha nga 2.5 kilo sa gituohang shabu kay adunay ₱500 cash nga gituohang halin sa drugas; usa ka Samsung keypad cellphone; ug usa ka backpack.
Gisumiter na ang nakumpiskar nga white crystalline substance sa Regional Forensic Unit 7 alang sa laboratory analysis.
Samtang, ang suspek kasamtangang gitanggong sa custodial facility sa Police Station 6, MCPO ug giandam na ang mga dokumento alang sa pagpasaka sa tukmang kaso ngadto sa korte. | via Bombo Rexmond Omega
