Ang Kagamhanang Lalawigan sa Sugbo maoy pagastuhon sa pagpatukod sa Liloan Children’s Hospital matod pa ni Cebu 5th District Representative Vincent “Duke” Frasco atol sa iyang post sa social media niadtong Huwebes, Agosto 14, 2025.
Kini maot nahimong tubag ni Frasco atol sa iyang apelar kang Cebu Provincial Governor Pamela “Pam” Baricuatro nga matod pa niya sa iyang pagpasabot kang ang balaudnong RA 11886 diin siya mismong nangamahan kay naglatid nga ang pagpundo sa pagpatukod sa tambalanan kay ang Kapitolyo sa Sugbo.
Napasar kini nga balaudnon niadtong Hunyo 29, 2022 diin subay sa Section 1 sa RA 11886 kay ang maong ospital pagatukoron sa lungsod sa Liloan ug ipaubos sa pagdumala ug superbisyon sa Kapitolyo sa Sugbo.
Dugang pa ni Frasco nga bisan pa man nagmando iyang balaod nga ang Kapitolyo magpundo niini kay naka-secure pa siya og P50-milyones karong 2025 gikan sa Department of Health (DOH) nga gikatakdang ipagawas sa Department of Budget and Management (DBM) sa dili pa ang buwan sa Septiyembre.
Apan bisan paman sa iyang pundong nakuha, kuwang gihapon kini kay adunay kinatibuk-ang balor sa P200-milyones ang pagpatukod sa unang pito ka andana sa ospital.
Gipanglantawan ni Frasco nga ang Liloan Children’s Hospital nga mahimong specialized medical facility susama sa Philippine Children’s Medical Center sa Manila diin aduna kiniy specialized pediatric services.
Ulahing apelar ni Frasco ngadto kang Baricuatro nga unta mapundohan sa umaabot pagtuki sa 2026 Provincial Budget sa Kapitolyo ang pagpundo sa ospital sa iyang lungsod alang sa kaayohan sa mga Sugbuanon.
