Pormal nga nisumiter sa iyang irrevocable resignation si National Bureau of Investigation (NBI) Director Jaime Santiago.
Base sa sulat nga adunay petsang Agosto 15, gipadala kini ngadto kang Presidente Ferdinand Marcos Jr. pinaagi ni Executive Secretary Lucas Bersamin, diin giingon ni Santiago nga andam siya mopahawa sa pwesto kung adunay kapuli nga itudlo ang Malacañang.
Gipahayag ni Santiago nga dili na niya maagwanta ang mga padayon nga intriga ug pagpangdaot batok sa iyang personalidad.
Si Santiago, usa ka kanhing pulis, piskal ug trial court judge, gitudlo nga NBI Director niadtong Hunyo 14 sa miaging tuig.
Sa iyang sulat, gidayeg ni Santiago ang anti-corruption campaign sa administrasyong Marcos, ug giila nga dakong hagit ang paglimpyo sa ahensya sa mga scalawag o tiwaling opisyal.
Apan, iyang gibutyag nga dihang misumite siya og courtesy resignation human sa eleksyon, nagsugod ang smear campaign batok kaniya.
Matod pa niya, nga ang mga bakak kung balik-balikon mahimong daw tinood. Dili niya tugutan nga matamakan ang dungog nga iyahang gitukod sa kadugayan niya sa iyahang serbisyo.
Wala pa’y opisyal nga pamahayag ang Malacañang kalabot niini.
Gipasalamatan ni Santiago si Pangulong Marcos ug misaad nga magapadayon gihapon siya sa pagtabang sa administrasyon.
