CEBU CITY- Nadakpan sa kapulisan ang duha ka mga lalaki nga giingong nalambigit sa pagpangawat sulod sa usa ka 03L jeepney sa Barangay Lorega San Miguel, niadtong Agosto 17, 2025.
Samtang, ang usa pa sa ilang kauban ang padayon pang gipangita sa mga awtoridad.
Ang biktima giila nga si Sheila May Respecia Ruiz, 21 anyos, residente sa Barangay Mabolo, gitiunan og armas ug gikawatan og iPhone 12 nga gibanabana nagkantidad og ₱14,000 samtang nagbiyahe sakay sa jeepney.
Human sa insidente, misibat ang mga suspetsado ngadto sa sulod sa Lorega.
Hinungdan, nga ang kapulisan gikan sa Area Beat Patroller 1 ug 2, kauban ang MPU Vios 05, dali nga miresponde ug naglunsad og hot pursuit operation.
Tungod niini, nadakpan ang duha ka suspek nga giilang sila si Vinz Niel Rayna Canucat, alyas “Daot”, 23 anyos, residente sa Sitio Camansi, Lorega, ug Arjohn Pobadora Boles, 18 anyos, taga Cebu City.
Nakuha usab ang usa ka armas nga Smith & Wesson .357 Magnum revolver, apan wala kini’y sulod nga bala.
Samtang, ang ikatulo nga suspek nga giilang si Michael Villacarillo Villanueva Jr., alyas “Gi-gi”, 32 anyos, residente sa Sitio Pipang, Barangay Tejero, padayon nga wala pa madakpi. Gituohang dala pa niya ang kinawat nga cellphone.
Nagpahimangno ang kapulisan sa publiko nga motabang sa paghatag og impormasyon kabahin sa nahabiling suspek aron kini dali nga madakpan.
