Gikumpirma sa South Korea kaniadtong Sabado, Agosto 23, nga nagpabuto kini og warning shot sa mga tropa sa North Korea subay sa utlanan tali sa duha ka nasud.
Ang insidente nahitabo niadtong Martes sa hapon, Agosto 19, taliwala sa nagpadayon nga pagtukod sa mga babag sa North Korea sukad sa miaging tuig aron permanenteng pagsira sa utlanan niini sa South Korea.
Base sa local media sa South Korea, ang South Korean joint chief of staff niingon nga ilang gihimo ang lakang human ang North Korean nga mga sundalo mitabok sa military demarcation line o nagtimaan sa mga limitasyon o utlanan sa duha ka nasud.
Matod niya nga miatras sab ang mga sundalo sa North Korea human sila nagpabuto og warning shots.
Sumala sa state media, ang North Korean Army Lt. General Ko Jong Chol miingon nga ang Seoul military migamit ug machine guns sa pagpabuto og labaw sa 10 ka warning shots sa ilang mga sundalo.
Ang pagbutyag sa publiko sa insidente dungan sa pagbiya sa bag-ong South Korean President nga si Lee Jae Myung gikan sa Seoul kagahapong adlawa aron mobisita sa Japan ug sa Estados Unidos.
Kahinumduman nga nabahin ang duha ka Korean states sukad sa Korean War nga natapos niadtong 1953.
Walay kasabotan sa kalinaw tali sa duha ka nasud, mao nga nagpabilin sila sa state of war bisan pa nga ang North Korea ug South Korea wala magbayloay og mga pag-atake sulod sa pipila ka mga tuig.
