Magpakunhod ang embahada sa South Korea sa Ukraine og gidaghanon sa ilang mga kawani human nagpahayag og pagkadismaya sa tubag sa Kyiv mahitungod sa pagbutyag sa publiko bahin sa pagbalhin sa mga prisoners of war (POW) gikan sa North Korea, sumala sa pahibalo sa Ministry of Foreign Affairs sa South Korea.
Matud ni Ministry spokesperson Park Doo-soon, nga alang sa Seoul, dili igo ang tubag sa Kyiv, bisan pa man sa padayon nga komunikasyon tali sa duha ka habig.
Naghisgot kini bahin sa pagbutyag sa publiko ni Ukrainian President Volodymyr Zelenskyy mahitungod sa pagbalhin sa duha ka sundalo gikan sa North Korea ngadto sa South Korea, usa ka lakang nga nakapahigawad sa Seoul.
Matod sa ministeryo, ang maong mga butang dili angay ibutyag sa publiko ug kinahanglang magpabilin nga kompidensyal aron masiguro ang kaluwasan sa mga pamilya sa maong mga sundalo didto sa North Korea.
“This measure was taken because we judged it necessary to facilitate an amicable resolution of the issue and restore trust between the two countries,” matod ni Park.
Wala gitino ni Park kung pila ka kawani sa embahada ang mobiya; hinuon, iyang gipahibalo nga magpabilin ang *chargé d’affaires* aron modumala sa mga operasyong diplomatiko, uban sa tibuok *consular staff*, aron masiguro ang kaluwasan sa mga lungsoranon sa South Korea taliwala sa hulga sa mga pag-atake gikan sa kahanginan sa Ukraine.
