MANDAUE CITY,CEBU- Nahugno na usab ang usa ka flood control project sa syudad sa Mandaue nga nahimutang sa Barangay Paknaan sulod sa 6.5 ka ektarya nga urban poor compound, base sa mga report sa residente sa lugar Martes sa gabii, Agosto 26.
Ang maong insidente nahitabo human lamang sa nahitabong kaparehong pagkahugno sa Barangay Casuntingan, nga kapareho usab og disenyo nga sheet pile flood control structure.
Sa public advisory nga giluwatan sa DPWH Sixth District Engineering Office kagabii, Agosto 27, gikompirmar nila ang maong insidente ug nagkanayon nga nagpadayon na ang mga repair works sa nadaot nga bahin sa proyekto.
Giklaro sa DPWH nga pressure sa tubig luyo sa PVC sheet piles maoy hinungdan sa pagkahugno, tungod kini sa kakulang sa outlet para sa tubig nga muagi gikan sa uwan.
Gisusi na sa mga engineers ug personnel sa DPWH ang lugar niadtong Agosto 25, usa ka adlaw sa wala pa mahugno ang estruktura, aron tan-awon ang kahimtang ug magplano sa mga remedyo. Apan sa wala pa nila matuman ang full repair, naguba na kini sa sunod nga gabii tungod sa grabeng ulan.
Sa pagkakaron, nagpadayon ang imbestigasyon sa DPWH ug gipanawagan ang mas hugot nga monitoring sa tanang flood control projects sa dakbayan, ilabi na sa panahon sa ting-ulan.
