Nakuratan ang pipila ka indibidwal sa dihang namataan ang usa ka lalaki nga mikat-kat sa transmission tower sa Sitio Salvacion, Barangay Maguikay, Mandaue gahapong adlawa, Miyerkules, Abril 29.
Sa eksklusibong pakighinabi sa Bombo Radyo Cebu news team kang Fire Officer 2, Andrew Tongco, kinsa nag-rescue kang alyas “Paul” nga taga Jubay, Liloan, aduna kini problema sa iyahang pamilya, ug sa ka problemado niini, nikatkat nalang sa transmission tower.
Gidugang pa ni Tongco, atol sa pag-rescue ni alyas “Paul” nakasinati kini og kalisud dyutay kay mo aksyon man kini og sukol, taliwala sa iyahang paghangyo nga pakanaogon lang kini.
Apan si alyas “Paul” nihangyo usab kaniya nga dili lang siya paduolon kay basin unya og molayat siya, hangtud nga oras ang milabay sa paghangyo niini—gibalibaran pa ang gitunol niya nga tubig, mipaambit kini nga mahadlok siya nga mokanaog sa gikat-katan niini nga tower kay basin unya og prisohon siya.
Dugang pa ni Tongco, dili usab siya makakompirmar nga kung “high” ba si alyas “Paul” kay wala man siya’y nakita nga senyales nga makapamatuod niini.
Ingun man nga naka-ingun siya nga dili desidido nga magkutlo sa kinabuhi si alyas “Paul” tungod kay wala man dayun kini nilayat og diretso, ug nikalma kini sa dihang naabot ang iyahang gituohang uyab nga niabot ug makig estorya kaniya.
