Nangayo og tabang ang usa ka 58-anyos nga engineer ug contractor sa Sta. Catalina, Negros Oriental ngadto kang Senador Rodante Marcoleta aron ma-imbistigahan ang korapsyon sa ilang dapit nga gituohang adunay kalambigitan sa pagpamusil kaniya.
Mao kini ang unod sa gipadala nga video ni Engr. Angelito Uy Mendoza, kinsang gipusil sa national highway sa Sitio Omanod, Barangay San Francisco niadtong Agusto 27, 2025.
Makita nga aduna pay bendahe ang nawng niini ug oxygen hose sa iyang ilong samtang nangayo og tabang nga maimbitihan sa senate inquiry ang mamumuo sa krimen ug aron molingasaw ang baho sa korapsyon sa ilang lugar.
Matud niini nga usa siya sa mga witness sa kasong gipasaka ni Kitty Torres sa ilang gobernador nga si Chaco Sagarbarria ug sa mga tawo niini gumikan sa korapsyon.
Ingon man ang extortion ug oppression diin gikanayon pa niini nga tulo ka tuig na sila nga giharass.
Nanghinaot kini nga madakpan ug mahatagan og kasulbaran ang problema sa iyang quarry nga gi-override sa dakong contractor.
