TALISAY CITY, CEBU- Gidala sa ospital ang dili moubos sa baynte (20) ka mga tawo human naglisod og ginhawa tungod sa chemical leak nga nahitabo sulod sa usa ka resort kagabii, Setyembre 2, 2025.
Paspas nga nitubag ang Bureau of Fire Protection (BFP) sa maong insidente sa dapit nga nahimutang sa Sitio Purok Cainta III, Brgy. Pooc, Talisay City, Cebu, mga alas-10 sa gabii, ug ilang gitaas ang alarma.
Sa interbyu sa Bombo Radyo Cebu, ni Fire Chief Inspector Glory Ann Bicoy, Talisay City Fire Marshal, ilang nadawat ang report kabahin sa pagbuto sa usa ka chemical mixture nga adunay kalambigitan sa chlorine nga dali ra nga misingaw sa palibot sa resort, nga hinungdan sa kalisod sa pagginhawa sa mga naapektohan nga residente — labaw na ang 10 ka customer nga nagsaulog og birthday duol sa nahimutangan sa insidente.
Tungod niini, dali nga naglunsad og flushing operation ang BFP-7 Special Operations Unit Hazmat Squad aron limpiyohan ang lugar, ug ilang nakit-an ang usa ka balde nga gituohang maoy adunay kemikal nga mibuto.
Samtang, dali usab nga nagtukod og command center ang City of Talisay Disaster Risk Reduction and Management Office aron motabang sa mga naapektuhan sa chemical leak.
Sa pagkakaron, nagpadayon ang imbestigasyon sa BFP-City of Talisay sa maong insidente, ug posible usab nga imbestigahan sa Talisay City Fire kung adunay nalapas nga regulasyon ang maong resort.
