CEBU CITY- Gikondena sa mga militanteng grupo ang giingong halapad nga korupsyon sulod sa Department of Public Works and Highways (DPWH), ilabi na sa mga proyekto sa flood control, atol sa usa ka symbolic protest karong buntaga sa atubangan sa DPWH District Engineering Office duol sa Pier 3, Cebu City.
Gipangulohan sa BAYAN Central Visayas ug Sanlakas Cebu ang maong protesta, kauban ang KABATAAN Partylist ug pipila ka mga aktibistang estudyante gikan sa nagkalain-laing unibersidad sa siyudad.
Bitbit ang mga placard ug bandera, nanawagan ang mga raliyista alang sa transparency ug accountability sa tanang proyekto sa gobyerno.
Ang labing nakadani sa atensyon sa publiko mao ang ilang paglabay og kamatis sa opisyal nga logo sa DPWH — usa ka aksyon nga ilang giila nga simbolo sa ilang kasuko batok sa gitawag nilang “baha sa korrupsyon.”
Sumala sa grupo, nagpadayon ang mga isyu sa ghost projects, substandard nga trabaho, ug contractor monopoly sulod sa DPWH.
Gipaninglan nila ang ahensya nga wala nakahatag ug klaro nga tubag sa mga alegasyon nga dugay nang gipangayo sa publiko.
Padayon usab ang ilang panawagan nga ihunong ang pag-abuso sa pondo sa katawhan ug ibalik ang hustisya alang sa mga proyekto nga gikatakdang makaluwas unta sa kinabuhi ug kabtangan sa mga komunidad nga permi biktima sa pagbaha.
