CENTRAL VISAYAS- Nagpagawas ang Philippine Atmospheric, Geophysical and Astronomical Services Administration (PAGASA) og General Flood Advisory #1 tungod sa epekto sa easterlies nga nakaapekto sa Southern Luzon, Visayas, ug Mindanao.
Sumala sa PAGASA, gipaabot ang mahuyang hangtod kasarangan nga pag-uwan ug mga pagpanaligsik (thunderstorms) sa mosunod nga 12 ka oras, nga mahimong hinungdan sa posibleng pagbaha, ilabi na sa mga lugar nga duol sa suba o ubos nga dapit.
Base sa advisory, posibleng moapekto ang pagbaha sa pipila ka mga suba sa tibuok rehiyon:
Kung diin, sa 𝐋𝐀𝐋𝐀𝐖𝐈𝐆𝐀𝐍 𝐒𝐀 𝐂𝐄𝐁𝐔: Maapektohan ang Kotkot River, Mananga River, Guinabasan River,Balamban River, ug Sabangdaku River.
Samtang sa 𝐁𝐎𝐇𝐎𝐋: Apektado ang Inabanga, Ipil, Matulid, Loboc, Abatan
Gipahimangnoan ang mga lumolupyo sa kabukiran ug ubos nga lugar nga mag-amping batok sa posibleng pagbaha o pagdahili sa yuta (landslide).
Gidasig usab ang tanang Local Disaster Risk Reduction and Management Councils (LDRRMCs) sa pagpatuman sa mga lakang sa kahimtang sa katalagman, ilabi na sa mga lugar nga sagad mabahaan.
Gikonsiderar nga delikado ang pagpabilin sa daplin sa mga suba ug gilay-on nga bukid, ilabina sa gabii o panahon nga kusog ang ulan.
Gihangyo ang publiko sa pag-monitor sa dugang nga mga advisories gikan sa PAGASA ug sa lokal nga mga disaster response offices.
