Nahulpa ang flood control project sa Barangay Lahug, Cebu City, kagahapon, adlawng Lunes, September 8, 2025.
Kini human sa bati nga panahon nga nasinati kagahapong adlawa.
Gibisita ni Cebu City Councilor Edgardo “Jaypee” Labella II, ang Chairman sa Committee on Infrastructure sa City Council ang mi-collapse nga flood control project didto sa nahisgutang lugar.
Nasuta ni Labella, base sa kasayuran nga gipadangat sa usa ka barangay tanod sa Lahug nga nahagsa ang riprap kagahapon sa buntag apan niadtong adlawng Dominggo pa kini nangliki.
Nasayran usab sa konsehal nga aduna nay, mi-collapse nga bahin sa maong riprap sa Sitio Tarkom sa Barangay Lahug.
Matud ni Labella, kinahanglan nga imbestigaran kini sa City Council aron makahimo og mga lakang ang City Government aron dili na mausban pa ang maong hitabo.
Dugang usab niini, nga kinahanglan usab nga hibaw-on kung kang kinsa kini nga flood control project kung sa kaulohan ba or sa lokal nga kagamhanan.
Samtang, una na usab nga gisusi sa mga sakop sa Department of Engineering and Public Works, Cebu City Disaster Risk Reduction Office ug Department of Environment and Natural Resources.
Sa pagkakaron, ang barangay Lahug adunay gitagana nga barangay personnel aron maoy mobantay sa dapit aron ang mga tawo ma-pahimangnoan nga dili magkumpyansa sa maong dapit gumikan kay agianan usab kini sa mga lumulupyo.
