Wala’y kabutangan ang kalipay ni Jervie Keith Marikit, usa sa mga tang-an sa Colegio De San Antonio De Padua sa dakbayan sa Danao, Cebu human nag top 2 sa August 2025 Licensure Examination for Criminologists nga adunay 92.35%.
Si Marikit, taga Polog Lungsod sa Consolacion, Cebu dako ang iyang pasalamat sa mga tawo nga nahimo niya nga support system aron makab-ot ang maong kalampusan sa iyang kinabuhi.
Atol sa pakighinabi sa Bombo Radyo Newsteam kang Marikit diin hangtud karon wala gihapon siya makatuo nga anaa siya sa ikaduhang pwesto, ingon man nga ang iyang gi-ampo lang kay igo ra makapasar ug ang iyang mga higala ug mga classmate.
Nahimo usab kini nga emosyonal sa iyang pagpadayag og pasalamat sa iyang pamilya ug paghandom sa tanang giagian hangtud nga nagmalampuson kini sa iyang gipili nga dalan taliwala sa kawad-on ug kalisod hilabi na sa pinansyal nga matang.
Nasayran usab nga mao kini ang unang higayon nga adunay nakasulod sa national topnotchers gikan sa Colegio De San Antonio De Padua sa dakbayan sa Danao, Cebu busa dako og garbo ingon man walay makatupong sa iyang gibati nga kalipay ug makonsiderar kini nga makasaysayanon sa ilang tunghaan.
