Naugdaw ang usa ka tanker truck nga nagdala og alcohol daplin sa highway sa Sitio Canduang, Brgy. Damolog, Sogod, Cebu, niadtong Sabado, Septiyembre 13, 2025.
Nasayran nga nanukad ang maong tanker truck nga gikargahan sa alcohol sa Bacolod ug paingon kini sa Davao City.
Base sa imbestigasyon, nga nawad-an og preno ang tanker truck hinungdan nga gisulayan niya kinig lihay sa kasugat nga multicab nga adunay mga pasahero, hinungdan nga milahus ug nabanggan niini ang usa motorsiklo ug dayung mipangka sa riprap.
Human sa panghitabo, misilaob ang atubangang bahin sa sakyanan, samtang ang tangke sa alkohol wala maunsa.
Matud sa truck driver nga si Bienvenido Talingting, gipaningkamotan niya nga dili maigo ang multicab nga adunay mga pasahero apan, adunay lima ka motor nga misugat niini hinungdan nga naigo ang maong motorsiklo nga miresulta sa kamatayon sa pasahero niini ug dayung misilaob ang atubangang bahin gumikan sa gas leak sa motor nga nakamugna ug kalayo.
Sapagka karon, anaa na sa kustodiya sa kapolisan ang drayber sa tanker samtang nangandam ang mga awtoridad sa pagpasaka sa tukmang kaso.
Mipahinumdom usab ang lokal nga kagamhanan ug mga hingtungdan nga ahensya sa mga motorista nga mag-amping pag-ayo sa pag-agi sa mga accident-probe areas ug pagsiguro nga ang ilang mga sakyanan naa sa maayo nga kahimtang sa dili pa mobiyahe.
