Ura-uradang gimandoan sa Department of the Interior and Local Government ang mga Local Government Units sa tibuok nasod nga molihok ilabina sa mga dapit nga direktang apektado sa magnitude 6.9 nga linog sa Sugbo.
Kini nga direktiba nagtumong sa pagsiguro sa kaluwasan ug kaayohan sa mga tawo sa mga apektadong komunidad.
Isip kabahin sa direktiba, ang DILG nimando nga ang tanang Local Disaster Risk Reduction and Management Councils (LDRRMCs) kinahanglang magtigom ug mag-organisa dayon aron masugdan ang koordinasyon nga mga operasyon.
Sa samang higayon, gikinahanglan usab nga i-activate ang Emergency Operations Centers (EOCs) ug ang Incident Management Teams (IMTs) aron magsilbing sentro sa komunikasyon ug paghimog desisyon sa panahon sa krisis.
Dugang niini, gipalihok usab ang tanang Barangay Disaster Risk Reduction and Management Council (BDRRMCs) sa mga apektadong lugar.
Gikinahanglan usab nga hatagan og prayoridad ang paghimo sa paspas nga pagsusi sa kadaot sa mga nag-unang imprastraktura sama sa mga dalan, tulay, mga edipisyo sa eskuylahan, ospital, ug uban pang hinungdanon nga pasilidad.
